Coordinaziun en il sectur da las scolas autas da pedagogia

Las scolas autas da pedagogia tutgan tipologicamain tar las scolas autas spezialisadas. Purtadas vegnan las scolas autas da pedagogia d'in u da plirs chantuns. Ina scola auta da pedagogia po avair plirs lieus. En il rom da la nova regulaziun da la coordinaziun da las scolas autas èn er las scolas autas da pedagogia vegnidas integradas en la direcziun generala dal mund svizzer da scola auta; ellas duain vegnir regladas per gronda part analogamain a las autras scolas autas; en spezial ston ellas sa suttametter ad in'accreditaziun instituziunala. Consequentamain èn las scolas autas da pedagogia vegnidas recepidas en la Lescha federala davart l'agid a las scolas autas e davart la coordinaziun en il sectur da las scolas autas svizras (LASA). Ellas vegnan però finanziadas vinavant exclusivamain dals chantuns. La LASA prevesa dentant che las scolas autas da pedagogia possian survegnir – ultra dals meds finanzials da las agenturas da perscrutaziun che stattan a disposiziun gia oz – contribuziuns federalas liadas a projects.


Per renconuscher sin nivel naziunal ils diploms che permettan da pratitgar la professiun e che vegnan surdads da las scolas autas da pedagogia e da las instituziuns da la furmaziun da persunas d'instrucziun è cumpetenta la Conferenza svizra dals directurs chantunals da l'educaziun publica (CDEP). La furmaziun da las persunas d'instrucziun sin plaun naziunal vegn dirigida en emprima lingia sur il dretg da la CDEP davart la renconuschientscha da diploms.


Il dretg davart la renconuschientscha da diploms regla la renconuschientscha naziunala dals diploms per las professiuns d'instrucziun e per tschertas professiuns dal sectur da la pedagogia speziala. Il dretg davart la renconuschientscha da diploms regla ultra da quai la controlla da la qualitad da la scolaziun e dals diploms. Ils reglaments da renconuschientscha che vegnan decretads sin basa dal dretg davart la renconuschientscha da diploms cuntegnan pretensiuns minimalas particularmain concernent las finamiras ed ils cuntegns da la scolaziun, la dimensiun dal studi, las premissas d'admissiun sco er la qualificaziun da las docentas e dals docents e da las persunas d'instrucziun da la pratica. 
 Il dretg davart la renconuschientscha da diploms è la premissa per la libra circulaziun naziunala ed internaziunala per pratitgar las professiuns d'instrucziun e tschertas professiuns da la pedagogia speziala.


La coordinaziun specifica tranter las instituziuns da la furmaziun da persunas d'instrucziun ha lieu en il rom da la Conferenza dals recturs da swissuniversities.

Letzte Aktualisierung dieser Seite: 10.02.2018

Job